Растение од градината на баба за кое науката зборува денес: потврдени се неговите моќни и изненадувачки својства
Нашите баби знаеја она што науката сега го потврдува: дека рузмаринот не е само зачин, туку и симбол на сила, бистрина и меморија. Гранчето што некогаш се закачувало над вратата за среќа, се ставало во косата пред испити или се фрлало во супа, сега е повторно во центарот на вниманието, овој пат благодарение на лабораториите и истражувачите кои откриваат колку навистина му користи на нашиот мозок.
Во античка Грција, студентите носеле гранчиња рузмарин во косата пред испитите, а Римјаните го гореле додека учеле. Она што античките интуитивно го чувствувале сега добива научна потврда: мирисот на рузмарин го стимулира протокот на крв, што пак го подобрува снабдувањето на мозокот со кислород и хранливи материи. Луѓето кои го вдишувале неговиот мирис имале подобри резултати на тестовите за меморија, покажуваат истражувањата.
Растение кое го буди мозокот
Рузмаринот содржи соединение наречено 1,8-цинеол, кое го забавува разградувањето на ацетилхолинот, хемикалија неопходна за учење и меморија. Ова може да помогне во одржувањето на фокусот и менталната острина, особено како што старееме. Исто така, е докажано дека есенцијалното масло од рузмарин го намалува стресот, што може да помогне со меморијата, бидејќи мирниот ум е поприемчив.
Благодарение на своите антиоксиданси, рузмаринот ги штити мозочните клетки од оштетување предизвикано од оксидативен стрес, процес поврзан со развојот на деменција. Токму затоа се споменува сè почесто како природен сојузник на мозокот.
Научниците сега отидоа чекор понатаму. Тие посветија посебно внимание на карнозинската киселина, природно соединение во рузмаринот кое покажа извонреден потенцијал во заштитата на мозокот. На почетокот на 2025 година, истражувачите од Истражувачкиот институт Скрипс развија синтетизирана верзија од неа, наречена diAcCA, која го намали количеството на токсични протеини поврзани со Алцхајмеровата болест и ја подобри меморијата кај експерименталните животни.
Професорот Стјуарт Липтон , раководител на истражувањето, објасни дека соединението делува само на делови од мозокот погодени од воспаление, без токсични несакани ефекти и го стимулира формирањето на нови синапси, врски меѓу невроните кои се клучни за учењето и меморијата.
Памтење и рамнотежа
Нашите баби можеби не знаеле што е ацетилхолин, но знаеле кога да запалат гранче рузмарин, да го стават во плакар, да го додадат во чај или супа. Нивната интуиција била вкоренета во биологијата – мирисот, некогаш знак на дом и топлина, сега е препознаен како природен начин за смирување, подобрување на концентрацијата и заштита на мозокот. Иако истражувањата за рузмаринот и Алцхајмеровата болест се уште се во рана фаза, сè поголем број научници веруваат дека традицијата и науката зборуваат на ист јазик во овој случај.
