Онколог: Ова е единственото нешто што го додавам во речиси секој оброк
Научните проценки покажуваат дека помеѓу 30 и 50 проценти од случаите на рак можат да се спречат преку поздрав начин на живот и балансирана исхрана.
Ова значи дека секој оброк може да биде можност да го поддржите сопственото здравје и да го намалите ризикот од болести. Онколозите истакнуваат дека исхраната не мора да биде комплицирана за да биде корисна – клучот е во свесните избори што се повторуваат ден по ден.
Експертите посебно ги истакнуваат полифенолите – растителни соединенија со антиинфламаторни и антиоксидантни својства – како важен дел од исхраната за превенција од рак.
„Полифенолите играат клучна улога бидејќи помагаат во намалувањето на воспалението, а се наоѓаат во зеленчук, овошје, зачини, јаткасти плодови и семиња“, вели онкологот д-р Мајкл Доминело за Parade. На пример, тој додава какао во прав богато со флавоноиди во утринското кафе, заедно со неколку боровинки, кои исто така содржат големи количини на полифеноли.
„Секој залак е одлука – или го негува здравјето или болеста“
Онкологот д-р Дон Мусалем истакнува: „Начинот на кој се храниме и живееме влијае на ризикот од рак. Хроничното воспаление е една од главните опасности.“ Затоа таа се одлучила за исхрана целосно базирана на растенија, богата со полифеноли, често вклучувајќи грав, јаткасти плодови, лиснат и крстоцест зеленчук и бобинки.
Д-р Латоња Ридл-Џонс вели дека вклучува темнолистен зеленчук како спанаќ и кељ во речиси секој оброк – честопати додавајќи ги во смутија и сосови. „Тоа е исто така начин децата да ги јадат без да забележат“, рече таа.
Сите тројца онколози се согласуваат и за тоа што треба да се избегнува: ултра-преработена храна, премногу шеќер и алкохол. „Секој залак е одлука – или го храни здравјето или болеста. Обидете се да јадете речиси совршено дома – на тој начин можете да изберете порелаксирано, без грижа на совеста, кога излегувате“, заклучи д-р Мусалем.
