Заборавеното овошје е вистинско богатство: Ги чисти цревата, го зајакнува имунитетот, добро за дијабетичари
Мушмулата е необично овошје, со карактеристичен вкус и специфична текстура, со потекло од Југоисточна Европа и Западна Азија, ценета со векови поради своите хранливи својства. Иако денес е помалку позната, се враќа во исхраната и козметиката, благодарение на своите хранливи придобивки.
Мушмулките се овошни дрвја од семејството рози (Rosaceae), а нивниот плод е тркалезен, кафеав по боја, со пет карактеристични „заби“ на врвот. На почетокот, тие се тврди и речиси нејадливи, но стануваат вкусни само кога ќе созреат, односно стануваат меки и збрчкани. Овој процес на созревање е клучен за нивната консумација, бидејќи тогаш плодот добива сладок и нежен вкус. Иако на прв поглед мушмулките може да изгледаат грдо и непривлечно, зад нивниот изглед се кријат мноштво хранливи материи кои имаат корисен ефект врз организмот.
Сезоната на мушмулки започнува кон крајот на есента, обично во октомври и ноември, кога се берат плодовите, но тие имаат најдобар вкус дури по првите мразови. Затоа често се вели дека мушмулките се „зимско овошје“ – овошје кое најдобро се јаде кога е веќе презреано . Откако ќе се наберат, обично се оставаат на ладно и суво место да созреат. По неколку недели или месеци, тие стануваат меки и подготвени за консумирање.
Плодовите може да се варат или печат и да се користат во разни јадења, како што се компоти, џемови, мармалади или сосови. Нивната слатко-кисела нота им дава посебен вкус на десертите, а често се комбинираат со јаболка, круши и друго овошје.
Листовите од мушмула имаат и лековити својства и може да се користат за правење чај кој помага при лошо варење и го зајакнува имунитетот. Иако, малку поретко, може да се сушат за консумирање во текот на зимата, на сличен начин како сливите или смоквите.
Идеално за јадење
Тие содржат висок процент на диететски влакна, кои помагаат во регулирањето на дигестивниот систем и спречување на запек. Поради нивните природни лаксативни својства, често се препорачуваат за луѓе со дигестивни проблеми. Ова овошје е богато со витамин Ц, кој е неопходен за зајакнување на имунитетот и заштита на телото од инфекции. Витаминот Ц, исто така, помага во борбата против слободните радикали и ги штити клетките од оксидативен стрес.
Поради нискиот гликемиски индекс, мушмулата е погодна за луѓе со дијабетес бидејќи не предизвикува нагло зголемување на шеќерот во крвта.
Мушмулките имаат благ диуретичен ефект , што го поттикнува излачувањето на вишокот течности и токсини од телото и на тој начин придонесува за детоксикација.
Козметичка индустрија
Освен што се корисни во исхраната, мушмулите сè повеќе се користат во козметичката индустрија. Екстрактите од плодот и семките од мушмулите се богати со антиоксиданси, витамини и есенцијални масни киселини, што ги прави одлични за нега на кожата и косата.
Екстрактите од мушмула помагаат во борбата против стареењето на кожата, го стимулираат производството на колаген и ја штитат кожата од штетни влијанија од околината. Кремите и серумите на база на мушмула ја хидрираат кожата, правејќи ја поеластична и сјајна. Маслото добиено од семките од мушмула може да се користи за нега на сува и оштетена коса. Го храни скалпот, го стимулира растот на косата и ја прави косата мазна и сјајна.
