Како да го заштитите мозокот од стареење
Мозокот нè прави она што сме, тој е примарен двигател на нашите мисли и постапки и со текот на времето станува единствена архива на нашите сопствени особини и искуства. Но, сепак, мозокот не се разликува од другите органи во физичка смисла. Клетките во мозокот стареат исто како и во секој друг дел од телото, во срцето или колковите…
„Кога зборуваме за стареење на мозокот, не го прифаќаме толку тешко како, на пример, брчките. Зрелиот мозок е пожелна работа “, вели Сузан Гринфилд, една од водечките британски научници во областа на неврологијата. Врските меѓу клетките во мозокот можат постојано да се обновуваат во текот на животот и да се зајакнуваат, но проблемот се појавува кога овие врски ќе престанат да работат .
Најчеста индикација за стареење на мозокот е губење на меморијата, а колку подолго живеат луѓето, толку е почеста сенилност. Сепак, мозокот може да се заштити и да се забави процесот на стареење.
Околу 20 отсто од луѓето носат ген кој значително го зголемува ризикот од развој на Алцхајмерова болест, но кај другите развојот на болеста зависи од начинот на кој го поминале животот.
Некои заедници, како што е заедницата на свештеници на Света Гора во Грција, воопшто немаат регистрирани случаи на сенилност или мозочен удар, а тоа се припишува на нивниот начин на живот без стрес и здрава исхрана.
Многу процеси можат да придонесат за губење на меморијата. Крвните садови во мозокот стануваат потесни, што го забавува протокот на крв во мозокот и го отежнува снабдувањето со кислород. Друг процес, иако сè уште не е целосно истражен, се однесува на непропорционална акумулација на амилоид во мозочните клетки.
Исто така, постојат некои докази дека луѓето со Алцхајмерова болест имале помали мозочни удари во текот на нивниот живот, кои не морале да се забележат. Понекогаш има мал излив на крв во мозокот без лицето воопшто да ја забележи состојбата.
Иако сенилноста најчесто се појавува кај луѓето над 80 години, научниците веруваат дека процесот започнува многу порано, во четириесеттите. И тогаш е неопходно да се започне со превенција.
Како што старееме, нашиот систем слабее, па затоа е неопходно да му помогнеме во исхраната. Важно е во исхраната да се вклучат многу намирници кои содржат антиоксиданси, како шумско овошје, брокула и сите други кои содржат витамин Ц и витамин Е.
Додатоци во исхраната со рибино масло богато со омега-3 масни киселини помагаат и со намалување на ризиците од кардиоваскуларни болести.
Не треба да се потценува ниту важноста на вежбањето. Не само што дебелината оди рака под рака со високиот крвен притисок, туку има и докази дека вежбањето го зајакнува мозокот, бидејќи во тие моменти до него стигнува повеќе крв.
Но, најважно е да се вежба самиот мозок. „Мозокот е како и секој друг мускул, колку повеќе го тренирате, толку станува посилен “, вели Гринфилд.
Треба постојано да се соочувате и да пробувате нови ситуации, да учите нови работи, јазици, да пополнувате крстозбори, да играте шах. Важно е да изберете активност во која уживате, но која има и благотворно дејство. Можете да пишувате симфонии, да пишувате новели или да развиете смисла за хумор.
