За промена: Кифлички со мелено месо
Не е комплицирано за правење, а може да биде новитет на вашето мени
Кифличките се прават на безброј начини, најчесто се полнат со комбинација од сирење и други состојки. Еве рецепт за малку поинаква варијанта исполнета со месо. Не е комплицирано за правење, а може да биде новитет на вашето мени.
За тестото:
100 мл вода
100 мл млеко
100 мл масло
1/2 лажичка сол
1/2 лажичка шеќер
1 кесичка (10 g) сув квасец
600 гр брашно
2 жолчки и сусам за премачкување и посипување
За полнење:
200 гр мелено месо
50 гр сирење
зачини по вкус (сол, бибер, сув зачин)
масло – по потреба
Подготовка:
Истурете брашно во длабок сад, додадете сув квасец, сол, шеќер и измешајте. Потоа додадете млако млеко, масло, млака вода и замесете тесто. Покријте со чиста кујнска крпа и оставете да отстои 30 минути.
За тоа време подгответе го филот. На врело масло пропржете го месото, зачинете по вкус (посолете, бибер и суви зачини) и оставете да се излади.
Добиеното тесто замесете го на набрашнета работна површина, со сукало виткајте го во поголем круг и исечете го на триаголници. На секој триаголник ставете по една лажичка фил и свиткајте ги кифличките. Покријте го плехот со хартија за печење, наредете ги подготвените кифлички и секој премачкајте го со изматени жолчки и посипете со сусам. Се пече во добро загреана рерна на 180 степени 25 минути.
